《講多錯多》part 0
每次公開場合講野（真係用口講），無論多人少人，事後都會檢討自己，一日唔講，就唔知道反應氣氛如何。愈怕講野，就愈需要講野，如果等到真正需要講野時諗唔到野講或者講得唔好就太遲了。
由細到大身邊都認識到一d說話既天才，有d後來真係做左DJ，有d做左MC，有d做緊保險。
每次要向一d對象說話，某程度上係一個實驗，係用黎feel下呢個世界，知多左個世界點運作。逆地而處，同理心，對方接收到呢d說話，個觀感係點，即時反應係點，長期反應係點，會搵多左你傾計？認同你？抑或怕左你？
呢幾年就係o係咁樣捱過黎。講野好唔好受？對我黎講，講野等於要我裸跑。
另一個講野既阻礙在於完美主義者，強迫症，我唔容許自己有野講錯，一旦講錯 會諗成晚，諗一千次可以表達得更好既組合。
一係就果個錯要錯得精彩，精彩到變左加分，咁果個錯就唔係錯，但如果到頭來冇預期效果，就係我錯。
所以我寧願用歌，用畫，用圖，用片，表達少少野。講野會錯，因為太實在，冇空間俾對方。有時對我黎講起身接收一小段文字已經夠我灰成日，但睇到一幅樹懶既圖，又有兩分鐘覺得人生有希望。
總唔可以答一個問題靠 畫一幅畫，同唱幾句歌 黎回應。只有硬住頭皮講。做監製，就係咁樣既一個不斷要我裸跑既過程。
可以既話，極度希望share一個松鼠咬紙巾既ig story俾對方黎解決煩惱。
如果用一句說話可以令對方安靜30日，慢慢等我做，我都想知，但果句說話未存在之前，需要不斷溝通。
但黎緊只有愈黎愈多情況需要講野。講得多，先知道邊d係，邊d唔係，講錯野會有咩後果，牽連有幾多。會唔會講講下講左d都唔係自己信念既野出黎。訊息有偏差，耽誤左下一步。
同樂手、同歌手、同唱片公司溝通，
慢慢知道一定唔會完美，就學講錯左點樣救返，要即時救，假如救到就會避免不必要既誤會。對象愈陌生 風險愈高，因為對方對你根本冇一個長久而整體既概念，一下子誤會就會將你歸類，而你根本救唔返。
佢地根本唔需要一個講多錯多既人，佢地需要一個可靠既，務實既，有效率最好有埋成果既，而完全唔講野 就唔可以令以上一一順利通過；十問九唔應，難相處，遲覆，唔岩時候亂咁搞爛gag，或者一味揶揄、放負，都係百害。搞到大家都好攰。
講係要講，又要講得黎有用，最好有時認真有時輕鬆。順利既話，講講下對方會不自覺驅動到，合作就會順暢；當然會遇著一d唔會講得明既人；亦會遇著一d為左面子或者勢力範圍而唔俾你得逞而故意唔覆你既人，即使你講既野係冇錯。
總之好煩，有排學。
Search